बोंडआळी(रु) बंजारा कविता

🍀🍀 *बोंडआळी*🍀🍀

*हूसेती लगायतो आपकाण सरकी*
*आदी नीकळी आदी मायीज मरगी*
*हायब्रीडेप बोंडआळी खास कीदी पारगी*
*करण तो माटी बीटी लायो परकी*--!!

*हाजारी बाजारी करताणी म भी लगायो बीटी*
*येक छूटी पणन बाकीर पात पकडन बेटी*
*फवारणी खतेती वकगी गाडीर खीटी*
*कर्जाती साळो वाजे लागी सीटी*--!!

*तीन बीटी आयी येक लार येक*
*केरी बीर आपकाणेर हंगाम खास देक*
*लस लस बूढांरो देको कायीं झोक*
*वोनं कायीं मालम भढा मायी वेती मेक*--!!

*केरोतो मयी धोळो माल आयो हात*
*पण आळी मायीती कीदी वोपर घात*
*बीटीर वळागी कू कायीं वात*
*मापरज धोगी साळो आछमाली हात*--!!

*रेगी सेगी कसर काडो बेपारी भायी*
*हूबी छोड पलाडी गो टोळी ढायी*
*कोयता पकड पसीनाती भूक मार वलायी*
*केन दू दोस मारे नसीबेरे मायी*--!!

✏️ विशाल बंडूसींग लूणसावत